பதினெண் கீழ்க்கணக்கு நூல்களுள் ஒன்று நான்மணிக்கடிகை ! விளம்பி
நாகனார் இயற்றிய இந்நூல் சங்ககாலத்தைச் சேர்ந்தது ! பாடல்
தோறும் நான்கு கருத்துகளை
வலியுறுத்துகிறார்
இந்தத் தமிழறிஞர். இதோ உங்களுக்காக ஒரு பாடல் !
-----------------------------------------------------------------------------------------------
பாடல்
எண்: (52)
---------------------------
இரைசுடும்
இன்புறா யாக்கையுட் பட்டால்
உரைசுடும்
ஒண்மை யிலாரை – வரைகொள்ளா
முன்னை ஒருவன்
வினைசுடும் வேந்தனையுந்
தன்னடைந்த
சேனை சுடும்.
-----------------------------------------------------------------------------------------------
சந்தி
பிரித்து எழுதிய பாடல்:
------------------------------------------------
இரை சுடும் இன்பு உறா யாக்கையுள் பட்டால்
உரை சுடும் ஒண்மை இலாரை – வரை
கொள்ளா
முன்னை ஒருவன்
வினை சுடும் வேந்தனையும்
தன் அடைந்த
சேனை சுடும்.
---------------------------------------------------------------------------------------------
கருத்துரை:
---------------------
உடல் நலம்
இல்லாதபோது, நாவுக்கு அடிமைப்பட்டுக் கண்டதையெல்லாம் உண்டால், செரியாமை
ஏற்பட்டு, நம்மைத் துன்புறுத்தும் !
அறிவற்ற மூடர்கள்
பேசக் கூடாதவற்றையெல்லாம் பேசுவதால், அவர்கள் வாய்ச்சொல்லே அவர்களுக்கு எதிராக மாறி, துன்பத்தை விளைவிக்கும் !
அறநெறிக்கு
மாறாக ஒருவன்
முன்பு செய்த தீய செயல்களெல்லாம் இப்போது அவனுக்கு எதிராக நின்று அவனையே துன்புறுத்தும் !
அதுபோல்,
அறநெறி தவறி அனைவரையும் துன்புறுத்தும்
அரசனை, அவனது படைகளைச் சேந்த வீரர்களே இரக்கமின்றிக் கொன்றுவிடுவார்கள்
!
-----------------------------------------------------------------------------------------------
சொற்பொருள்:
-----------------------------
இரை
= உணவு ; இன்பு உறா = பிணியினால்
துன்பமுறும் ; யாக்கையுள் பட்டால் = வயிற்றில்
சேர்ந்தால் ; சுடும் = வருத்தும் ; ஒண்மை இலாரை
= அறிவு விளக்கம் இல்லாதவர்களை ; உரை சுடும்
= அவர் வாய்மொழியே அவரைத் துன்புறுத்தும் ; ஒருவன்
= ஒருவனது ; வரை கொள்ளா = அறத்தின் எல்லையிற்
படாத ; முன்னை வினை = முன் செய்த
தீவினை ; சுடும் = இப்பிறப்பில் வந்து வருத்தும் ; வரை
கொள்ளா = அறத்தின் எல்லையிற் படாத ; வேந்தனையும்
= அரசனையும்
; தான் அடைந்த = தன்னைச் சேர்ந்த ; சேனை
= படைகளே ; சுடும் = கொல்லும்.
----------------------------------------------------------------------------------------------
சுருக்கக்
கருத்து:
----------------------------
பிணியுள்ள உடம்பில் சேரும் உணவு செரியாமையால் துன்புறுத்தும் ; அறிவிலாரை அவர் வாய்ச்சொல்லே வருத்தும் ; முன் செய்த தீவினைகள் இம்மையில் வந்து துன்புறுத்தும் ; அறத்தின் வரையில் நில்லாத அரசனைச் சேனைகளே கொல்லும் !
----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ.
[தி.ஆ:2052,நளி (கார்த்திகை),14]
{30-11-2021}
---------------------------------------------------------------------------------------------
