விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
---------------------------------------------------------------------------------------------
பாடல் எண்: (102)
---------------------------------
ஏரி சிறிதாயின் நீரூரும் இல்லத்து
வாரி சிறிதாயின் பெண்ணூரும் மேலைத்
தவஞ்சிறி தாயின் வினையூரும் ஊரும்
உரன்சிறி தாயின் பகை.
-----------------------------------------------------------------------------------------------
சந்தி பிரித்து எழுதிய பாடல்:
-----------------------------------------------------------------------------------------------
ஏரி சிறிதாயின் நீர் ஊரும்; இல்லத்து
வாரி சிறிதாயின் பெண் ஊரும்; மேலைத்
தவம் சிறிது ஆயின் வினை ஊரும்; ஊரும்
உரன் சிறிதாயின் பகை.
----------------------------------------------------------------------------------------------
கருத்துரை:
---------------------
நீரைத் தேக்கி வைக்கும் குளம் சிறிதாக இருந்தால், நிரம்பிய பின் குளத்து நீர் வழிந்து ஓடும் !
குடும்பத்தின் வருவாய் குறைவாக இருந்தால், வாழ்க்கைத்
துணைவியும் வரம்பு
கடந்து பேசுவாள் !
செய்த நல்வினைகள் சிறிதாக இருந்தால், வாழ்க்கையில்
தீவினைகள் விரைவாக வந்து
சூழும் !
உடல்வலியும் மனவலியும் சிறிதாக இருந்தால், ஒருவன்
பகைவர்களின் பிடிகளுக்குள் நொடியில் வீழ்வான் !
------------------------------------------------------------------------------------------------
சொற்பொருள்:
----------------------------
ஏரி சிறிதாயின் = குளம்
சிறிதானால் ; நீர் ஊரும் = நீர் வழிந்துவிடும் ; இல்லத்து = வீட்டில் ; வாரி
சிறிதாயின் = வருமானம் குறைவானால் ; பெண்
ஊரும் = மனையாள் நிலை கடந்து போவாள் ; மேலைத்
தவம் சிறிதாயின் = முற்பிறப்பின் நல்வினை குறைவானால் ; வினை
ஊரும் = தீவினை பெருகும் ; உரன்
சிறிதாயின் = ஒருவன் வலிமை சிறிதானால் ; பகை ஊரும் = பகைவர்
வென்றிடுவர்.
-----------------------------------------------------------------------------------------------
சுருக்கக் கருத்து:
--------------------------------
ஏரி சிறிதானால் நீர் வழிந்து போய்விடும் ; வீட்டின்
வருவாய் குறைவானால் மனையாள் வரம்பு கடந்து பேசுவாள் ; முன்னைத்
தவம் சிறிதானால் தீவினை மிகுந்து வருத்தும் ; வலிமை
சிறிதானால் பகைவர் மேற்போந்து வென்றிடுவர்.
-----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
தமிழ்ப் பணி மன்றம்.
[தி.ஆ:2052,நளி (கார்த்திகை),28]
{14-12-2021}
-----------------------------------------------------------------------------------------------
