நான்மணிக்கடிகை பதினெண் கீழ்க்கணக்கு நூல்களுள் ஒன்று ! விளம்பி
நாகனார் இயற்றிய இந்நூல் சங்ககாலத்தைச் சேர்ந்தது ! பாடல்
தோறும் நான்கு கருத்துகளை
நாகனார் வலியுறுத்துகிறார். இதோ
உங்களுக்காக ஒரு பாடல் !
-------------------------------------------------------------------------------------------------
பாடல் எண்: (50)
---------------------------
போதினான் நந்தும் புணைதண்டார் மற்றதன்
தாதினான் நந்தும் சுரும்பெல்லாந் – தீதில்
வினையினான் நந்துவர் மக்களுந் தத்தம்
நனையினான் நந்தும் நறா.
---------------------------------------------------------------------------------------------
சந்தி பிரித்து எழுதிய பாடல்:
-------------------------------------------------
போதினால் நந்தும் புனை தண் தார் மற்று அதன்
தாதினால் நந்தும் சுரும்பு எல்லாம் – தீது
இல்
வினையினால் நந்துவர் மக்களும் தம் தம்
நனையினால் நந்தும் நறா .
-----------------------------------------------------------------------------------------------
கருத்துரை:
---------------------
மாலையில் தொடுக்கப் பெறும் பூக்களின் தன்மைக்கும் மணத்திற்கும் ஏற்பவே, அம் மாலையின் மதிப்பும், உயர்நிலையை அடைகிறது !
தீதற்ற பூக்களில் சுரக்கும் இனிமை நிறைந்த தேனை உண்பதால் தான், வண்டு இனமும் நலமுடன் செழிப்படைந்து வாழ்கிறது !
கெடுநோக்கம் துளியேனும் கலவாத நற்செய்கைகளால் தான் நன்மக்கள்
மிகுந்த புகழையும் உயர்வையும்
தம்வாழ்வில் அடைகின்றனர் !
அதுபோல், துளித் துளியாய்ச் சுரந்து நிற்கும் மலர்களின் வகைக்கும் தன்மைக்கும் ஏற்பவே தேனின் நற்குணமும் உயர்ந்தநிலை அடைகிறது !
-----------------------------------------------------------------------------------------------
சொற்பொருள்:
----------------------------
புனை தண் தார் = தொடுக்கப்படும் குளிர்ந்த
மாலை ; போதினால் = பூக்களால் ; நந்தும் = மிக்கு
விளங்கும் ; சுரும்பு எல்லாம் = வண்டுகள்
எல்லாம் ; அதன் தாதினால் = அப் பூக்களின் தேனால் ; நந்தும் = மிக்குப்
பொலியும் ; மக்களும் = உலகத்து மக்களும் ; தீது
இல் வினையினால் = குற்றமில்லாத நற்செய்கைகளால் ; நந்துவர் = உயர்வு
அடைவர் ; நறா = தேன் வகைகள் ; தம் தம் (தத்தம்) = தாம்
தாம் இருக்கும் ; நனையினால் = பூவரும்பின் வகையினால் ; நந்தும் = பெருகி
நல்லனவாகும்.
-----------------------------------------------------------------------------------------------
சுருக்கக் கருத்து:
------------------------------
மலர் மாலை பூவினால் பொலிவடையும்; வண்டுகள் அப் பூவிலுள்ள தேனால் நன்மை பெறும் ; மக்கள்
தம் நற்செய்கைகளால் உயர்வடைவர் ; அதுபோல், தாமிருக்கும் மலர் வகைகளுக்கேற்பத் தேனும் பெருகி வளம் பெருக்கும் !
-----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),13]
{29-11-2021}
-----------------------------------------------------------------------------------------------
