பதினெண்கீழ்க் கணக்கு நூல்களுள்
ஒன்றான நான்மணிக் கடிகையை இயற்றியவர் விளம்பி நாகனார் என்னும் பெரும் புலவர். கி.பி. 2 –ஆம் நூற்றாண்டில்
தோன்றியது இவ்விலக்கியம் ! இதிலிருந்து ஒரு பாடல் !
----------------------------------------------------------------------------------------------
பாடல் (05)
-------------------
மண்ணி அறிப மணிநலம்; பண்ணமைத்து
ஏறியபின் அறிப மாநலம்; மாசறச்
சுட்டறிப, பொன்னின் நலம்காண்பார்; கெட்டறிப
கேளிரான் ஆய பயன் !
-----------------------------------------------------------------------------------------------
கருத்துரை:
-----------------------
மாணிக்கம் முதலான மணிகளின் இயல்பை
ஆய்ந்து அறியும் வல்லுநர்கள்,
அவற்றை நீரால் கழுவி அறிவார்கள் !
குதிரையின் இயல்பை ஆய்ந்து அறியும்
வல்லுநர்கள், அதன் மேல் சேணம் பூட்டி ஏறி நடத்திச் சென்று அறிவார்கள் !
பொன்னின் இயல்பை ( மாற்றினை ) அறியும்
வல்லுநர்கள் அதனை நெருப்பில் புடமிட்டு உருக்கி அறிவார்கள் !
ஆனால், உறவினர்களின் இயல்பை அறிய விரும்பும் மனிதன், அவன் வறுமைக்கு உள்ளாகித் துன்பப்படும் காலத்தில்
தான் அறியமுடியும் !
------------------------------------------------------------------------------------------------
சொற்பொருள்:
-----------------------------
மணி நலம் = மாணிக்கம் முதலான மணிகளின் நல்லியல்பை; மண்ணி அறிப = நீரால் கழுவி அறிவார்கள்; மா நலம் = குதிரையின் நல்லியல்பை; பண்ணமைத்து = அதன் மேற் சேணம் பூட்டி; ஏறிய பின் அறிப = ஏறிய பின் அறிவார்கள்; பொன்னின் நலம் காண்பார் = பொன்னின் மாற்றை அறிபவர்கள் ; மாசு அற = பொன்னின் மாசு நீங்கும் வகையில்; சுட்டு அறிப = அதனை உருக்கி அறிவார்கள்; கேளிரான் ஆய பயன் = உறவினர்களால் உண்டாகும் பயனை; கெட்டு அறிப = செல்வமெல்லாம் கெட்டு வறிய நிலை அடையும் காலத்தில் அறிவார்கள்.
------------------------------------------------------------------------------------------------
கருத்துச் சுருக்கம்:
-------------------------------------
ஒளிமணிகளை நீரால் கழுவி அதன் தரம் அறிவார்கள் ! புரவியின் இயல்பை சேணம் பூட்டி அதில் ஏறி அறிவார்கள் ! பொன்னின் தரத்தைப் புடம் போட்டு அறிவார்கள் ! உறவினர்களின் இயல்பை வறுமைக் காலத்தில் தான் அறிய முடியும் !
-------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052, நளி(கார்த்திகை)01]
{17-11-2021}
-------------------------------------------------------------------------------------------------