விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு
நூல்களுள் ஒன்று ! இந்நூல்
சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
-------------------------------------------------------------------------------------------------
பாடல் எண்: (63)
-------------------------------
நெய்விதிர்ப்ப நந்தும் நெருப்பழல், சேர்ந்து
வழுத்த வரங்கொடுப்பர் நாகர் – தொழுத்திறந்து
கன்றூட்ட நந்துங் கறவை கலம்பரப்பி
நன்றூட்ட நந்தும் விருந்து.
-------------------------------------------------------------------------------------------------
சந்தி பிரித்து எழுதிய பாடல்:
-----------------------------------------------------
நெய் விதிர்ப்ப நந்தும் நெருப்பு அழல்; சேர்ந்து
வழுத்த வரம் கொடுப்பர் நாகர்; – தொழுத்
திறந்து
கன்று ஊட்ட நந்தும் கறவை; கலம்
பரப்பி
நன்று ஊட்ட நந்தும் விருந்து.
-------------------------------------------------------------------------------------------------
கருத்துரை:
-----------------------
வேள்வித் தீயில் உருக்கிய நெய்யைச் சொரியச் சொரியத் தான்
அந்த தீயின் சுடர் மேலும் மேலும் கொழுந்து விட்டு எரியும் !
நாகர்கள் எனப்படும் தேவர்களை வாழ்த்த வாழ்த்தத் தான் அவர்கள்
வாழ்த்துவோருக்குச் செய்யும் நன்மைகள்
பெருகும் !
கன்றினைத் தாயிடம் விடுகையில், அது ஓடிவந்து
மடியில் முட்டி முட்டிக் குடிக்கையில் தான் மேலும் மேலும் பால் சுரக்கும் !
அதுபோல், தலைவாழை இலையிட்டு அன்புடன் உணவை அள்ளி அள்ளிப் பரிமாறுகையில் தான் விருந்தினரிடம் மகிழ்ச்சி பெருகும் !
------------------------------------------------------------------------------------------------
சொற்பொருள்:
---------------------------
நெருப்பு அழல் = வேள்வித் தீயின் சுடர் ; நெய்
விதிர்ப்ப = நெய்யைச் சிந்த ; நந்தும் = ஓங்கும் ; நாகர் = தேவர்கள் ; சேர்ந்து வழுத்த = தம்மைப்
பிறர் அணுகி ஏத்த ; வரம் கொடுப்பர் = வேண்டும்
நன்மைளை அளிப்பர் ; கறவை = ஆக்கள் ; தொழுத் திறந்து = கொட்டிலைத்
திறந்து ; கன்று ஊட்ட = கன்றுகளை உண்பிக்க ; நந்தும் = பால்
பெருக்கெடுக்கும் ; கலம் பரப்பி = இலையை விரித்து ; நன்று
ஊட்ட = இனிமையாக உண்பிக்க ; விருந்து
நந்தும் = விருந்தினர் மனம் களிப்பர்.
-------------------------------------------------------------------------------------------------
சுருக்கக் கருத்து:
--------------------------------
நெய்யைச் சொரிய அழல் வளர்ந்து எரியும் ; தம்மை
வழுத்தினால் தேவர் நன்மை தருவர் ; கன்றை உண்பிக்க ஆன் பால் பெருகும் ; இனிமையாய்
விருந்தளிக்க, விருந்தினர் மகிழ்வர்.
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),16]
{02-12-2021}
------------------------------------------------------------------------------------------------
