நான்மணிக்கடிகை என்பது
பதினெண் கீழ்க்கணக்கு நூல்களுள் ஒன்று. முழுவதும் வெண்பாக்களால்
இயலும் நூல். இதை இயற்றியவர் விளம்பி நாகனார் என்னும் பெரும் புலவர். சங்க
கால இலக்கியமான இதிலிருந்து ஒரு பாடல் !
-----------------------------------------------------------------------------------------------
பாடல் எண்:
(40)
------------------------
கரப்பவர்க்குச் செல்சார் கவிழ்தலெஞ்
ஞான்றும்
இரப்பவர்க்குச் செல்சார்ரொன் றீவார் – பரப்பமைந்த
தானைக்குச் செல்சார் தறுகண்மை
ஊனுண்டல்
செய்யாமை செல்சா ருயிர்க்கு
!
------------------------------------------------------------------------------------------------
சந்தி பிரித்து எழுதிய பாடல்:
------------------------------------------------------------------------------------------------
கரப்பவர்க்குச் செல்சார் கவிழ்தல் எஞ்ஞான்றும்
இரப்பவர்க்குச் செல்சார் ஒன்று ஈவார்
– பரப்பு அமைந்த
தானைக்குச் செல்சார் தறுகண்மை ஊனுண்டல்
செய்யாமை செல்சார் உயிர்க்கு !
-----------------------------------------------------------------------------------
கருத்துரை:
------------------
தன்னிடம் பொருள் இருந்தும்,
இரவலர்க்குத் தர விரும்பாத கறுப்பு உள்ளம் படைத்தோர்க்குப் பற்றுக்கோடாய் அமைவது, இரவலரைக் கண்டதும் தலைகுனிந்து
கொண்டு , கண்டும் காணாது நிற்றலாகும் !
இல்லையென்று இரப்பவர்களுக்கு பற்றுக்
கோடாய் அமைவது , எக்காலத்தும் இல்லையென்று சொல்லாது ஈத்துவக்கும் நன்மனம் படைத்த நல்லவர்களை நாடிச் செல்லுதலாகும்
!
போர்க்களத்தில் பரபரப்பும், சுறு சுறுப்புமாக
இயங்கும் படைகளுக்கு
வெற்றியை ஈட்டித் தரும் பற்றுக்
கோடாய் அமைவது அவர்களது அச்சமின்மையும் வீரமுமாகும்
!
அதுபோல்,
மனித உயிர்களுக்கு மாண்பு தரும் பற்றுக் கோடாக அமைவது பிற உயிரினங்களைக் கொன்று அவற்றின் இறைச்சியை உண்ணாது தவிர்த்தல் ஆகும்
!
------------------------------------------------------------------------------------------------
சொற்பொருள்:
-----------------------
கரப்பவர்க்கு
= ஏதும் இல்லை என்று ஒளிப்பவர்களுக்கு ; செல்சார்
= அவர் மேற்கொள்ளும் சார்பு; (செல்சார் = சார்பு என்பது
பொருள்; அஃதாவது சார்ந்து நிற்றற்குரிய நிலை அல்லது பற்றுக்கோடு) கவிழ்தல் = இரந்து வருவாரைக்
கண்டவிடத்து முகம் கவிழ்ந்து நிற்றலாகும்; எஞ்ஞான்றும் = எக்காலத்தும்;
இரப்பவர்க்கு = இல்லையென்று கேட்டு வரும் இரவலர்க்கு; செல்சார் = செல்லுதற்குரிய
பற்றுக்கோடு; ஒன்று
ஈவார் = தாம் வேண்டுவதொன்றை தந்து மகிழ்ச்சி கொள்ளும் செல்வராவார்; பரப்பு
அமைந்த = போரில் சுறு சுறுப்பு உடைய ; தானைக்கு
= படைக்கு; செல்சார் = பற்றுக்கோடு;
தறுகண்மை = வீரமாகும்; உயிர்க்கு
= ஒருவனது உயிருக்கு ; செல்சார் = செல்லுதற்குரிய
பற்றுக்கோடு; ஊன் உண்டல் செய்யாமை = பிற
உயிர்களின் இறைச்சியை உண்ணாமல் இருத்தலாகும்.
------------------------------------------------------------------------------------------------
சுருக்கக் கருத்து:
--------------------------
இரவலர்க்கு இல்லையென்பார்க்குப்
பற்றுக் கோடு, தலைகுனிந்து வேறு புறம் பார்த்து நிற்றல்; இல்லாத வறியவர்க்குப் பற்றுக்கோடு ஈத்துவக்கும் நல்லோர்கள்; படைகளுக்குப் பற்றுக்கோடு அவர்களது வீரம்; உயிர்களுக்குப் பற்றுக்கோடு , பிறவுயிர்களைக்
கொன்று உண்ணாமை !
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),04]
{20-11-2021}
-----------------------------------------------------------------------------------------------
