விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல்
தோறும் நான்கு கருத்துகளை
எடுத்துரைக்கிறார்
இந்தத் தமிழறிஞர். இதோ உங்களுக்காக ஒரு பாடல் !
---------------------------------------------------------------------------------------------
பாடல் எண்: (84)
--------------------------------
நல்லார்க்குந் தம்மூரென் றூரில்லை நன்னெறிச்
செல்வார்க்குந் தம்மூரென் றூரில்லை – யல்லாக்
கடைகட்குந் தம்மூரென் றூரில்லை தங்கைத்
துடையார்க்கும் எவ்வூரு மூர்.
----------------------------------------------------------------------------------------------
சந்தி பிரித்து எழுதிய பாடல்:
----------------------------------------------------------------------------------------------
நல்லார்க்கும் தம் ஊர் என்று ஊரில்லை; நன்னெறிச்
செல்வார்க்கும் தம் ஊர் என்று ஊரில்லை - அல்லால்
கடைகட்கும் தம் ஊர் என்று ஊரில்லை ; தம் கைத்து
உடையார்க்கும் எவ்வூரும் ஊர்.
----------------------------------------------------------------------------------------------
கருத்துரை:
------------------------
கல்வியறிவிற் சிறந்தவர்களை எல்லா ஊராரும் வரவேற்று வழிபடுவர்; உணவளித்து
உண்பிப்பர்; . ஆகையால் கற்றார்க்கு தம் ஊரென்று எவ்வூரும் இல்லை. எல்லா
ஊர்களும் அவரது ஊர்களேயாம் !
தவநெறியில் வழுவாது ஒழுகும் சான்றோர்களை எவ்வூராரும் வரவேற்று
வழிபடுவர்; உணவளித்து ஓம்புவர்; ஆகையால்
தவத்தோர்க்குத் தம் ஊரென்று எவ்வூரும் இல்லை. எல்லா
ஊர்களும் அவரது ஊர்களேயாம் !
கீழ்மக்களுக்குத் தம் ஊரிலும் மதிப்பிருக்காது ; பிற ஊர்களிலும்
மதிப்பிருக்காது; அவர்களுக்கு உணவளித்து உண்பிக்க எவ்வூரிலும் எவரும் முன்வாரார்; ஆகையால்
கீழோர்க்கு தம் ஊரென்று எவ்வூரும் இல்லை ! எல்லா ஊரும் அயலூரே !
செல்வந்தர்களுக்குச் செல்லும் இடமெல்லாம் ஆலவட்டம் சுழற்றுவதற்கு
ஆள்கள் நிரம்பவே
இருப்பர்; ஆகையால் கையில் பொருள் உடையோர்க்கு தம் ஊரென்று எவ்வூரும்
இல்லை. எல்லா ஊர்களும் அவரது ஊர்களேயாம் !
------------------------------------------------------------------------------------------------
சொற்பொருள்:
-------------------------------
நல்லார்க்கும் = கல்வியறிவில் நல்லார்க்கும் ; தம் ஊர்
என்று = தமக்குரிய ஊரென்று ; ஊரில்லை = ஓரூருமில்லை, எல்லாம்
அவரூரேயாம் ; நல் நெறி = தவ நெறியில் ; செல்வார்க்கும் = ஒழுகும்
அருந் தவத்தோர்க்கும் ; தம் ஊர் என்று = தமக்குரிய ஊரென்று ; ஊரில்லை = ஓர் ஊர்
இல்லை ; அல்லா = மேலோர் அல்லாத ; கடைகட்கும் = கீழ்மக்களுக்கும் ; தம் ஊர்
என்று = தமக்குரிய ஊர் என்று ; ஊர் இல்லை = ஓரூருமில்லை ; தம் கைத்து = தமது
கையில் ; உடையார்க்கும் = பொருள் உடையவர்க்கும் ; எவ்வூரும் ஊர் = எவ்வூரும் தம் ஊரேயாம் .
----------------------------------------------------------------------------------------------
சுருக்கக் கருத்து:
---------------------------------
கற்றார்க்கும் எவ்வூரும் தம்மூர் ; தவத்தோர்க்கும்
எவ்வூரும் தம்மூர் ; கீழ்மக்கட்கும் எவ்வூரும் தம்மூர் ; தம் கையில்
பொருள் உடையார்க்கும் எவ்வூரும் தம்மூர்.
-----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),27]
{13-12-2021}
----------------------------------------------------------------------------------------------
