விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
---------------------------------------------------------------------------------------------
பாடல் எண்: (86)
-------------------------------
நீரான் வீறெய்தும் விளைநிலம் நீர்வழங்கும்
பண்டத்தாற் பாடெய்தும் பட்டினம் – கொண்டாளும்
நாட்டான்வீ றெய்துவர் மன்னவர் கூத்தொருவன்
ஆடலாற் பாடு பெறும்.
-----------------------------------------------------------------------------------------------
சந்தி பிரித்து எழுதிய பாடல்:
----------------------------------------------------------------------------------------------
நீரால் வீறு எய்தும் விளை நிலம்; நீர்
வழங்கும்
பண்டத்தால் பாடு எய்தும் பட்டினம்; – கொண்டு
ஆளும்
நாட்டால் வீறு எய்துவர் மன்னவர்; கூத்து
ஒருவன்
ஆடலால் பாடு பெறும்.
-----------------------------------------------------------------------------------------------
கருத்துரை:
-----------------------
தண்ணீர்ப் பாய்ச்சலால் (பாசனத்தால்) பயிர்
விளையும் நிலம் செழிப்படையும் !
கடல் கொடுக்கும் முத்து முதலிய பண்டங்களால் நகரங்கள் பெருமை
பெறும் !
தான் கைப்பற்றி ஆளும் நாட்டு மக்களின் நற்செயல்களால் மன்னர்
சிறப்படைவர் !
வல்லவன் ஒருவனின் நடிப்புத் திறனால் நாடகத்தின் காட்சிகள் மேம்படும் !
-----------------------------------------------------------------------------------------------
சொற்பொருள்:
-----------------------------
நீரான் = தண்ணீர் பாய்ச்சுவதால் ; விளைநிலம் = பயிர்
விளையும் நிலம் ; வீறு எய்தும் = செழிப்படையும் ; நீர்
வழங்கும் = கடல் கொடுக்கும் ; பண்டத்தால் = முத்து
முதலிய பொருள்களால் ; பட்டினம் = நகரம் ; பாடு எய்தும் = பெருமை பெறும் ; கொண்டு = தங்கீழ்க்
கைப்பற்றி ; ஆளும் = அரசாளும் ; நாட்டான் = நாட்டினால் ; மன்னவர் = அரசர் ; வீறு
எய்துவர் = சிறப்படைவர் ; ஒருவன் = வல்லவன்
ஒருவன் ; ஆடலால் = ஆடுதலால் ; கூத்து = நாடகம் ; பாடு பெறும் = மேன்மை அடையும்.
-----------------------------------------------------------------------------------------------
சுருக்கக் கருத்து:
--------------------------------
விளைநிலம் நீர் பாய்ச்சலால் செழிப்படையும் ; பட்டினங்கள்
கடல் வளத்தால் பெருமையுறும் ; மன்னர் தம் ஆளும் நாட்டினால் சிறப்படைவர் ; வல்லான் ஒருவன் நடிப்பால் கூத்து மேம்படும்.
----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),27]
{13-12-2021}
----------------------------------------------------------------------------------------------
