நான்மணிக்கடிகை பதினெண் கீழ்க்கணக்கு நூல்களுள் ஒன்று ! விளம்பி
நாகனார் இயற்றிய இந்நூல் சங்ககாலத்தைச் சேர்ந்தது ! பாடல்
தோறும் நான்கு கருத்துகளை
நாகனார் வலியுறுத்துகிறார். இதோ
உங்களுக்காக ஒரு பாடல் !
-------------------------------------------------------------------------------------------------
பாடல் எண்: (51)
------------------------------
சிறந்தார்க் கரிய செறுதலெஞ் ஞான்றும்
பிறந்தார்க் கரிய துணைதுறந்து வாழ்தல்
வரைந்தார்க் கரிய வகுத்தூண் இரந்தார்க்கொன்
றில்லென்றல் யார்க்கும் அரிது.
------------------------------------------------------------------------------------------------
சந்தி பிரித்து எழுதிய பாடல்
-----------------------------------------------
சிறந்தார்க்கு அரிய செறுதல், எஞ்ஞான்றும்
பிறந்தார்க்கு அரிய துணை துறந்து வாழ்தல்,
வரைந்தார்க்கு அரிய வகுத்து ஊண், இரந்தார்க்கு
ஒன்று
இல் என்றல் யார்க்கும் அரிது.
------------------------------------------------------------------------------------------------
கருத்துரை:
---------------------
மிகச்சிறந்த நண்பர்கள் என்று கருதப்படுவோர் எவரும் சினம்
கொள்வதில்லை; அவர்கள் எக்காலத்திலும் ஒருவரையொருவர் சினந்து கொள்வதில்லை !
உயர்குடியில் பிறந்த மேன்மக்கள், சுற்றத்தாரை
அரவணைத்தே வாழ்வர் ; அவர்கள் தம் சுற்றத்தாரை விட்டு எக்காலத்திலும் விலகி வாழ்வதில்லை !
செல்வத்தைத் தமக்காக மட்டுமே செலவு செய்பவர்களும் இருக்கிறார்கள் ; அவர்கள் பிறருடன் பகிர்ந்து உண்பதை எக்காலத்திலும் விரும்புவது இல்லை !
அதுபோல், ஈர நெஞ்சுடைய மாந்தர்களும் இவ்வுலகில் இருக்கிறார்கள் ; அவர்கள்
இரந்து வருவோரிடம் இல்லை என்று எக்காலத்திலும்
சொல்வது இல்லை !
------------------------------------------------------------------------------------
சொற்பொருள்:
-------------------------------
சிறந்தார்க்கு = நட்பிற் சிறந்தவர்களுக்கு ; செறுதல் = தம் நண்பர்களின் செயல்களில் பிழை கண்டவிடத்து அவர்களைச் சினந்து விலக்கி வைத்தல் ; அரிய = இலவாம் ; பிறந்தார்க்கு = உயர்
குடியில் பிறந்த மேலோர்க்கு ; எஞ்ஞான்றும் = எக்காலத்திலும் ; துணை
துறந்து வாழ்தல் = தமக்குத் துணையான சுற்றங்களை துரந்து வாழுதல் என்பது ; அரிய = இல ; வரைந்தார்க்கு = உணவின்
பொருட் செலவைத் தமக்கென்றே அளவு செய்து வாழ்கின்றவர்களுக்கு ; வகுத்து
ஊண் = பிறர்க்குப் பகுத்து அளித்து உண்ணும் நிகழ்ச்சிகள் ; அரிய = இல ; யார்க்கும் = ஈர நெஞ்சுடைய
எவருக்கும் ; இரந்தார்க்கு = தம்பால்
வந்து இரந்து கேட்பவர்கட்கு ; ஒன்று = ஒரு பொருள் ; இல் என்றல் = இல்லை
என்று மறுத்துக் கூறுதல் ; அரிது = இல்லை.
------------------------------------------------------------------------------------------------
சுருக்கக் கருத்து:
--------------------------------
சிறந்த நண்பர்கள் தம்முள் ஒருவரையொருவர் சினந்துகொள்ளார் ; உயர் குடிப்பிறப்பினர் தன் இனத்தாரை நீங்கி வாழார் ; தமக்காகவே செலவு செய்கின்றவர்கள்
பிறர்க்குப் பகுத்துண்டல் செய்வாரல்லர் ; அருள் உடையவர் எல்லோரும்
இரந்தார்க்கு இல்லை என்று சொல்லார் !
-----------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),13]
{29-11-2021}
----------------------------------------------------------------------------------------------
