பதினெண்
கீழ்க்கணக்கு நூல்களுள்
ஒன்றாகிய நான்மணிக் கடிகை கடவுள் வாழ்த்து உள்பட 106 பாடல்களைக் கொண்டது.. இதை இயற்றியவர் விளம்பி நாகனார்
என்னும் பெரும் புலவர். இதிலிருந்து ஒரு பாடல் !
-----------------------------------------------------------------------------------------------
பாடல்:(06)
--------------------
கள்ளி
வயிற்றில் அகில் பிறக்கும்; மான் வயிற்றில்
ஒள்ளரி தாரம் பிறக்கும்; பெருங்கடலுள்
பல்விலைய
முத்தம் பிறக்கும்; அறிவார்யார்
நல்லாள்
பிறக்குங் குடி.
------------------------------------------------------------------------------------------------
கருத்துரை:
----------------------
காட்டில், தானாகவே தோன்றி வளர்வது கள்ளிச் செடி.
எந்த உயிரினத்திற்கும் எவ்வித பயனுமில்லாத இந்தக் கள்ளிச் செடிகளுக்கு நடுவில்தான் பெருமதிப்புடைய அகில் தோன்றி
வளர்கிறது !
கானகத்தே திரிந்து வாழ்கிறது மான். உண்பவர்க்கு அல்லால், பிறருக்கு
எவ்வகையிலும் பயன்படாத இந்த மானின் வயிற்றில் தான் ஒப்பனைக் கலைக்குப் பெரிதும் உதவுகின்ற அரிதாரம்
தோன்றுகிறது !
தாகம் ஏற்படுகையில், உண்பதற்கு ஒரு துளியும் தகுதியில்லாதது உவர்நீர். இத்தகைய உவர்நீர் நிறைந்திருக்கும் பெருங்கடலில் தான் விலைமதிக்க முடியாத முத்து பிறக்கிறது !
இப்படி ஒவ்வொன்றின் பிறப்பையும் அறியமுடிகிற மனிதனால் நல்லொழுக்கம் மிக்க சான்றோர் எந்தக் குடியில் பிறக்கிறார்கள்
என்பதை மட்டும் அறிய முடிவதில்லை !
ஏன் ? இதுதான் இயற்கையின்
திருவிளையாடல் !
-------------------------------------------------------------------------------------------------
சொற்பொருள்:
-------------------------------
அகில் = அகிற் கட்டை; கள்ளி வயிற்றின் பிறக்கும் = கள்ளி மரத்தின்
நடுவில் உண்டாகும் ; ஒள்
அரிதாரம் = ஒளியுள்ள அரிதாரம்; மான் வயிற்றில் பிறக்கும் =
மான் வயிற்றில் உண்டாகும்; பல் விலைய முத்தம் =
மிக்க விலையுடைய முத்துக்கள்; பெருங் கடலுள்
பிறக்கும் = பெரிய கடலினுள் பிறக்கும்; நல் ஆள் = நல்ல மக்கள்; பிறக்கும்
குடி = பிறக்கும் குடியை; அறிவார் யார்
= முன்பே அறிய வல்லவர் யார் ? (யாருமில்லை)
------------------------------------------------------------------------------------------------
கருத்துச் சுருக்கம்:
--------------------------------
கள்ளிச் செடிகளுக்கு இடையில் அகில் தோன்றி வளர்கிறது; மானின் வயிற்றில் அரிதாரம்
தோன்றுகிறது; கடலில் முத்து பிறக்கிறது; ஆனால், சான்றோர் பிறக்கும் குடியை யாரும் அறிய வல்லார்
யாரோ ? யாராலும் முடியாது !
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),01]
{17-11-2021}
-------------------------------------------------------------------------------------------------
