கடைச்சங்க
காலமான கி.பி. 2-ஆம் நூற்றாண்டு வாக்கில் தோன்றிய இலக்கியமான நான்மணிக்கடிகை, பதினெண் கீழ்க்கணக்கு நூல்களுள் ஒன்று ! விளம்பி என்னும் ஊரில் பிறந்து
வாழ்ந்த நாகனார் என்னும் பெரும்புலவர் இந்நுலை இயற்றியுள்ளார். இதிலிருந்து ஒரு பாடல் !
------------------------------------------------------------------------------------------------
பாடல்
எண்: (16)
------------------------------
வளப்பாத்தி யுள்வளரும் வண்மை; கிளைக்குழாம்
இன்சொற் குழியுள் இனிதெழூஉம்; வன்சொல்
கரவெழூஉம் கண்ணில் குழியுள்; இரவெழூஉம்
இன்மைக் குழியுள் விரைந்து.
-----------------------------------------------------------------------------------------------
கருத்துரை:
------------------------
”ஈகை” என்னும் போற்றத்
தக்க பயிரானது செல்வம்
என்னும் பாத்தியுள் தான் செழித்து வளரும் !
நம்மைச்
சார்ந்த உறவினர்கள்
என்னும் பயிர் நாம்
உதிர்க்கும் இன்சொல் என்னும் பாத்தியில் தான் வளமாக வளரும் !
வன்சொல்லோடு கூடிய வஞ்சனை என்னும் பயிர், கண்ணோட்டம் (அருள்) இன்மை என்னும் பாத்தியுள் தான்
வேர்விட்டுப் பெருகி வளரும் !
அதுபோல், ”இரத்தல்” என்னும் பயிர் “வறுமை” குடிகொண்டிருக்கும் பாத்தியுள் தான்
விரைவாக வளரும் !
-------------------------------------------------------------------------------------------------
சொற்பொருள்:
----------------------------
வண்மை = “ஈகை” என்னும் பயிர் ; வளப்பாத்தியுள்
வளரும் = செல்வம் என்னும் பாத்தியுள் விளையும் ; கிளைக்
குழாம் = உறவினர் கூட்டம் ; இன்சொல்
குழியுள் = இன்சொல் எனும் பாத்திய்ள் ; எழூஉம் = செழுமையாய்
வளரும் ; வன்சொல் கரவு = வன்சொல்லோடு
கூடிய வஞ்சனை என்னும் பயிர் ; கண் இல் குழியுள் = கண்ணோட்டம்
இன்மை என்னும் பாத்தியுள் ; எழூஉம் = வளரும் ; “இரவு’ = இரத்தல் என்னும் பயிர் ; இன்மைக்
குழியுள் = “வறுமை”யாகிய பாத்தியுள் ; விரைந்து
எழூஉம் = உடனே வளரும்.
-------------------------------------------------------------------------------------------------
சுருக்கக் கருத்து:
------------------------------
ஈகை செல்வத்தால் உண்டாகும்; உறவினர்க்கு மகிழ்ச்சி இன்சொல்லால் உண்டாகும்;
வன்சொல்லும், வஞ்சனையுள்
கண்ணோடாமையால் உண்டாகும்; இரத்தல் வறுமையால் உண்டாகும் !
-------------------------------------------------------------------------------------------------
ஆக்கம் + இடுகை;
வை.வேதரெத்தினம்,
[veda70.vv@gmail.com]
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),02]
{18-11-2021}
-------------------------------------------------------------------------------------------------
