விளம்பி நாகனார் இயற்றிய நான்மணிக்
கடிகை பல கருத்தான பாடல்களைக் கொண்ட இலக்கியம் ! முத்து முத்தான 101 பாடல்களைக் கொண்ட நீதி நூல் ! அதிலிருந்து
ஒரு பாடல் !
-----------------------------------------------------------------------------------------------
பாடல் (04)
----------------------
பறைபட வாழா அசுணமா; உள்ளம்
குறைபட வாழார் உரவோர் – நிறைவனத்து
நெல்பட்ட கண்ணே வெதிர்சாம் தனக்கொவ்வா
சொல்பட்டால் சாவதாம் சால்பு !
-----------------------------------------------------------------------------------------------
கருத்துரை:
----------------------
அசுணமா என்னும் கேகயப் பறவைக்கு
பறையொலி பிடிக்காது;
பறையொலியைக் கேட்டால் அஃது உயிர் நீத்துவிடும் !
அறிவார்ந்த மக்கள் தமது மதிப்புக்கு
மாசு நேர்வதை விரும்பமாட்டார்;
நேர்ந்தால் உயிர் வாழத் துணியார் !
மூங்கில் தூர்களில் அதன் வாணாளில்
ஒருமுறைதான் அரிசி விளையும்;
விளைந்த பின் அவை உயிர் வாழாது பட்டுப் போகும் !
அதுபோல், நிறையுடைய
சான்றோர் தம்மீது பழிச்சொல் ஏற்படுவதைப் பொறுக்க மாட்டார்; ஏற்பட்டால்
அக்கணமே உயிர் துறப்பர் !
------------------------------------------------------------------------------------------------
சொற் பொருள்:
------------------------------
அசுணமா = கேகயப் பறவைகள் (இதை மயில் என்கின்றனர் சிலர் ) பறைபட வாழா = பறையின் ஓசை தம் செவியிற் பட்டால்
உயிர் வாழமாட்டா; உரவோர் = அறிவுடையோர் ; உள்ளம்
குறைபட வாழார் = தமது பெருநிலை குறைபட்டால், உயிர் தாங்க மாட்டார்; நிறைவனத்து = மரங்கள் நிறைந்தகாட்டிலுள்ள ; வெதிர் = மூங்கில் ; நெல்பட்ட கண்ணே = அகவை முதிர்ந்து நெல் விளையும் காலத்தில்; சாம் = பட்டுப்போகும்
; சால்பு = நிறையுடைய சான்றோர்; தனக்கு ஒவ்வாச் சொல்பட வாழாது = தமது நிறைவுக்குக்
குறைவான இழிவுரைகள் உண்டானால் உயிர் வாழ மாட்டார் .
------------------------------------------------------------------------------------------------
கருத்துச் சுருக்கம்:
------------------------------------
அசுணமா பறையொலி கேட்டால் உயிர் வாழாது;
அறிவுடையோர் தம் மதிப்புக்கு மாசு ஏற்பட
இசையார் உயிர்நீப்பர்; மூங்கில் தூர் அரிசி விளைந்தபின் பட்டுப்போகும்; அதுபோல்,
சான்றோர், பழிச்சொல் ஏற்பட்டால் உயிர் வாழ
விரும்பார் !
-------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.!
[தி.ஆ:2052, நளி (கார்த்திகை),01]
{17-11-2021}
-------------------------------------------------------------------------------------------------
