பதினெண் கீழ்க்கணக்கு நூல்களுள் ஒன்றாகிய நான்மணிக் கடிகை கடவுள் வாழ்த்து உள்பட 106 பாடல்களைக்
கொண்டது..இதை இயற்றியவர் விளம்பி நாகனார் என்னும் பெரும் புலவர். சங்க
கால இலக்கியமான இதிலிருந்து ஒரு பாடல் !
-----------------------------------------------------------------------------------------------
பாடல் எண்:
(39)
-------------------------
நகையினிது நட்டார் நடுவண் பொருளின்
தொகையினிது தொட்டு வழங்கின் - வகையுடைப்
பெண்ணினிது பேணி வழிபடின் - பண்ணினிது
பாடல் உணர்வா ரகத்து.
------------------------------------------------------------------------------------------------
சந்தி பிரித்து எழுதிய பாடல்
------------------------------------------------------------------------------------------------
நகை இனிது நட்டார் நடுவண்,
பொருளின்
தொகை இனிது தொட்டு வழங்கின்,
– வகையுடைப்
பெண் இனிது பேணி வழிபடின்,
– பண் இனிது
பாடல் உணர்வார் அகத்து.
------------------------------------------------------------------------------------------------
கருத்துரை:
------------------
நண்பர்களை அணுகும் போது இறுக்கமான
முகக்குறிப்புகள் மன மகிழ்ச்சியைத் தராது; முகமலர்ச்சியுடன் அணுகினால் தான் நட்பினால் இன்பம் விளையும்
!
சேர்த்து வைத்திருக்கும் செல்வக் குவியல்,
மனத்திற்கு இன்பம் தந்துவிடாது; ; அதை வறிவர்களுக்கு வழங்கும் போது தான் செல்வத்தினால் மிகுந்த இன்பம் விளையும் !
கணவனுடன் முரண்பட்டால் இல்லறவாழ்வு இனிமை தராது; கணவனுக்கு ஊக்கமளித்துத் தாங்கிப் பிடிக்கும் மனைவியின் துணையே இல்லறத்தில் இனிமையைப் பெருக்கும்
!
அதுபோல் பாடலின் பொருளை உணராதவர்களுக்கு
இசை இனிக்காது; பாடலின் பொருளை முழுமையாக உணர்ந்து சுவைப்பார்க்கு மட்டுமே அப்பாடலின் இசை இனிமையைத் தரும் !
------------------------------------------------------------------------------------------------
சொற்பொருள்:
-----------------------
நகை = மகிழ்ச்சி;
நட்டார் நடுவண் = நண்பர்களிடையே; இனிது
= இன்பம் தரும்; பொருளின் தொகை = செல்வக் குவியல்;
தொட்டு வழங்கின் = எடுத்து ஏழைகளுக்கு வழங்கப்பெற்றால்;
இனிது = இன்பம் தருவதாகும்; வகையுடைப்
பெண் = நற்குடிப் பிறந்த பெண் ; பேணி
வழிபடின் = கணவனைப் போற்றி அவன் வழி நின்றால்; இனிது = இன்பம் பெருகும்; பண் = இசை; பாடல் உணர்வார் அகத்து = பாட்டின்
பொருளை உணர வல்லவரிடத்து; இனிது = இனிதாம்.
------------------------------------------------------------------------------------------------
சுருக்கக் கருத்து:
-------------------------
முகமலர்ச்சியுடன் பழகுதல் நட்பில்
இனிமை தரும்; வறிவர்க்கு
வழங்கும் போது செல்வத்தினால் இன்பம் விளையும்; முரண்படா
மனைவியினால் இல்லறத்தில் இன்பம் விளையும்; பாடலின்
பொருளை உணர்ந்தார்க்கே, பண் இனிமை தடும் !
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),04]
{20-11-2021}
------------------------------------------------------------------------------------------------
