ஒவ்வொரு
பாடலிலும் நந்நான்கு
கருத்துகளை உள்ளடக்கியது நான்மணிக் கடிகை ! கி.பி. 2-ஆம் நூற்றாண்டு
வாக்கில் தோன்றிய இந்நூலை இயற்றியவர் விளம்பி நாகனார் என்னும் பெரும்புலவர் !. இதிலிருந்து ஒரு பாடல் !
-------------------------------------------------------------------------------------------------
பாடல்
எண்.(15)
----------------------------
பறைநன்று பண்ணமையா யாழின் – நிறைநின்ற
பெண்ணன்று பீடிலா மாந்தரின் – பண்ணழிந்து
ஆர்தலின்
நன்று பசித்தல் – பசைந்தாரின்
தீர்தலின் தீப்புகுதல் நன்று.
-------------------------------------------------------------------------------------------------
கருத்துரை:
----------------------
செவிகளுக்கு இனிமை உணர்வைத் தரும் பண்ணிசை அமையாத
யாழைவிடப் பேரோசை எழுப்பும் பறை நல்லது !
பெருந்தன்மை இல்லாத ஆண்
மக்களைவிட, அடக்கம் மிகுந்த கற்பரசிகளான பெண்
மக்கள் நல்லவராவார் !
ஆக்கிய உணவு ஆறிப் பதனழிந்த பிறகு அதை உண்பதைவிடப் பசியால் வருந்தித்
துன்பப்படுதல் நல்லது !
அதுபோல், நம்மை விரும்பி அன்பு செலுத்துபவர்களை விட்டு நீங்கி
வாழ்வதைவிட எரியில் வீழ்ந்து உயிர்விடுதல் மிகவும் நல்லது !
-------------------------------------------------------------------------------------------------
சொற்பொருள்:
----------------------------
பண் அமையா = பண்ணிசை அமையாத ; யாழின் = “யாழ்” என்னும்
இன்னிசைக் கருவியினும் ; பறை நன்று = “பறை” என்னும் பேரோசைக் கருவி நன்றாம் ; பீடு
இலா = பெருந்தன்மை அமையாத ; மாந்தரின் = ஆண் மக்களினும் ; நிறை நின்ற = கற்பில்
நின்று அடக்கமுடைய ; பெண் நன்று = பெண் மக்கள் நல்லர் ; பண் அழிந்து = பதங்கெட்டு
; ஆர்தலின் = உண்டலினும் ; பசித்தல் நன்று = பசியுடன் வருந்துதல் நன்று ;
பசைந்தாரின் = தம்மை விரும்பினாரினின்றும் ; தீர்தலின் = நீங்கி உயிர் வாழ்தலை விட
; தீப்புகுதல் நன்று = எரியில் வீழ்ந்து உயிர் விடுதல் நல்லது
-------------------------------------------------------------------------------------------------
சுருக்கக்
கருத்து:
-----------------------------
பறை, இசையமையா யாழினும்
மேல்; கற்பமைந்த
பெண்டிர், வினைத்திறன் அறியா ஆடவரினும் மேல்; பசித்தல், பண்டங்களைப் பதங்கெட உண்ணலினும்
மேல் ; தீப்புகுதல், விரும்பினாரை நீங்கி வாழ்தலினும் மேல் ஆகும் !
-------------------------------------------------------------------------------------------------
ஆக்கம் + இடுகை;
வை.வேதரெத்தினம்,
[veda70.vv@gmail.com]
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),02]
{18-11-2021}
-------------------------------------------------------------------------------------------------
