விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
--------------------------------------------------------------------------------------------
பாடல் எண்: (76)
--------------------------------
தேவ ரனையர் புலவருந் தேவர்
தமரனையர் ஓரூர் உறைவார் – தமருள்ளும்
பெற்றன்னர் பேணி வழிபடுவார் கற்றன்னர்
கற்றாரைக் காத லவர்
---------------------------------------------------------------------------------------------
சந்தி பிரித்து எழுதிய பாடல்:
---------------------------------------------------------------------------------------------
தேவர் அனையர் புலவரும்; தேவர்
தமர் அனையர் ஓரூர் உறைவார் – தமருள்ளும்
பெற்றன்னர் பேணி வழிபடுவார்; கற்றன்னர்
கற்றாரைக் காதல் அவர்.
----------------------------------------------------------------------------------------------
கருத்துரை:
-----------------------
தாய்மொழியில் பற்றும் ஆளுமையும் அறிவுத் திறனும் மிக்க ஆன்றோர்கள், “புலவர்” எனப்படுவர்; இவர்கள்
வானுலக மாந்தர்களுக்கு இணையான உயர்ந்த மனிதர்கள் !
இத்தகைய உயர்ந்த மனிதர்கள் உறைகின்ற ஊரில் வாழ்கின்ற நற்பேறு பெற்ற மக்கள் அனைவரும், வானவர்களின்
உறவினர்களுக்கு இணையான சீரிய மனிதர்கள் !
இத்தகைய சீரிய மனிதர்களுள்ளும், “புலவர்” பெருமக்களை
விரும்பி அவர்களின் வழிநடந்து, பின்பற்றி வழிபடுபவர்கள், அவர்களின் அருள்பெற்ற ஆளுமைகள்
ஆவார்கள் !
இத்தகைய மேன்மை பெற்ற “புலவர்”கள் பால்
அன்பு செலுத்தி, அவர்களின் அறிவுரைகளை வாழ்க்கை நெறியாகக் கொள்பவர்கள், அப்புலவர்களுக்கே
இணையானவர்கள் !
---------------------------------------------------------------------------------------------
சொற்பொருள்:
--------------------------
புலவரும் = கல்வியறிவு உடைய புலவர்களும் ; தேவர்
அனையர் = தேவருக்கு ஒப்பாவார்கள் ; ஓர் ஊர்
உறைவார் = அப்புலவர்கள் உள்ள ஊரில் வாழ்பவர்கள் ; தேவர்
தமர் அனையர் = அத் தேவர்களின் உறவினருக்கு ஒப்பாவார்கள் ; தமருள்ளும் = அவ்வாறு
உறைந்து உறவானவருள்ளும் ; பேணி வழிபடுவார் = அப்புலவரை
விரும்பி வழிபட்டவர்கள் ; பெற்றன்னர் = அவர்தம் அருள் பெற்றாரை
ஒப்பர் ; கற்றாரைக் காதலவர் = புலவரைக்
காதலித்து ஒழுகுவார் ; கற்றன்னர் = அப்புலவரை ஒப்பக் கற்றவரே
ஆவர்.
----------------------------------------------------------------------------------------------
சுருக்கக் கருத்து:
--------------------------------
புலவர்கள் தேவரை ஒப்பர் ; அவர்
ஊரில் உறைவார் அவர் உறவினரை ஒப்பர் ; அவருள்ளும் பேணி வழிபடுவார் அவர் அருள் பெற்றாரை ஒப்பர் ; காதலித்து
ஒழுகுவார் அக் கற்றாரையே ஒப்பர்.
---------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),26]
{12-12-2021}
---------------------------------------------------------------------------------------------
