கி.பி. 2
–ஆம் நூற்றாண்டில் தோன்றிய நான்மணிக்கடிகை கடவுள் வாழ்த்து உள்பட
106 செய்யுள்களை உள்ளடக்கியது. விளம்பி நாகனார் என்னும் பெரும்புலவர் இதைப் படைத்துள்ளார். ஒவ்வொரு
பாடலிலும் நந்நான்கு
மணி மணியான கருத்துளைச் சொல்வதால் இது நான்மணிக்கடிகை எனப் பெயர்பெற்றது. இதிலிருந்து
ஒரு செய்யுள் !
------------------------------------------------------------------------------------------------
பாடல் எண்:
(22)
----------------------------
மனைக்குப் பாழ் வாள்நுதல்
இன்மை; தான் செல்லும்
திசைக்குப் பாழ்நட்டோரை இன்மை; இருந்த
அவைக்குப் பாழ் மூத்தோரை இன்மை; தனக்குப்பாழ்
கற்றறி வில்லா உடம்பு.
-------------------------------------------------------------------------------------------------
பொருள்:
-----------------
மனைவி இல்லாத வீட்டில் அழகும் மகிழ்ச்சியும்
துளியளவும் இருக்காது என்பதால் அவ்வீடு விரைவாக நலிவடைந்து போகும் !
செல்கின்ற ஊர்களில் நமக்கு நண்பர்கள்
இல்லாதிருந்தால், இளைப்பாற இடமின்றி நமது செலவு (பயணம்) நலிவடைந்து போகும் !
கல்வி, கேள்விகளிற்
சிறந்த மூத்தோர்கள் இல்லாத அவை, நெறிப்படுத்துவார் இன்றி விரைந்து நலிவடைந்து போகும் !
அதுபோல், கல்வி அறிவு
இல்லாத, மனிதனின் வெறும் உடம்பினால் பயனேதுமில்லை; அவன் வாழ்வே
நலிவடைந்து போகும் !
-------------------------------------------------------------------------------------------------
அருஞ்சொற்பொருள்:
------------------------------
மனைக்குப் பாழ் = மனைக்குப் பாழாவது
; வாள் நுதல் இன்மை = மனைவி இல்லாமை ; தான் செல்லும் = தான் போகும் ; திசைக்குப் பாழ்
= ஊர்ப்புறங்களுக்குப் பாழாவது ; நட்டோரை இன்மை = அவ்விடங்களில் நண்பர்கள் இல்லாமை
; இருந்த அவைக்குப் பாழ் = பலரும் கூடியிருந்த அவைக்குப் பாழாவது ; மூத்தோரை இன்மை
= கல்வி கேள்வி முதலியவற்றால் சிறந்த சான்றோரை
இல்லாமை ; தனக்குப் பாழ் = பிறவியெடுத்த தனக்குப் பாழாவது ; கற்றறிவு இல்லா உடம்பு
= கல்வியறிவு பெறாத வெறும் புலாலுடம்பு உள்ளமையாம்..
-------------------------------------------------------------------------------------------------
சுருக்கக் கருத்து:
-------------------------------
மனைவி இல்லா மனை பாழ்; நண்பரில்லாப்
பக்கம் பாழ்; ஆன்றோரில்லா அவை பாழ்; கற்றறிவில்லா உடம்பு பாழ் !
-------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),03]
{19-11-2021}
-------------------------------------------------------------------------------------------------
