விளம்பி நாகனார் என்னும் சங்க
காலப் புலவர் படைத்த நூல் நான்மணிக்கடிகை ! முழுவதும் வெண்பாக்களால் ஆன இந்நூலில் கடவுள் வாழ்த்து உள்பட
106 பாடல்கள் இடம்பெற்றுள்ளன ! இதிலிருந்து
ஒரு பாடல் !
-------------------------------------------------------------------------------------------------
பாடல் எண்:
(27)
---------------------------
அஞ்சாமை அஞ்சுதி ஒன்றின் தனக்கொத்த
எஞ்சாமை எஞ்சல் அளவெல்லாம் – நெஞ்சறியக்
கோடாமை கோடி பொருள்பெறினும் நாடாதி
நட்டார்கண் விட்ட வினை.
-------------------------------------------------------------------------------------------------
பொருள்:
----------------
அஞ்சுதற்குரிய செயல்களைக் கண்டு அஞ்சுதல் வேண்டும் ;
அதற்கு மாறாக அஞ்சாமலிருப்பது தவறு ;
எனவே அதைக் கைவிடுவாயாக
!
பிறருக்கு உதவி செய்யும் நற்பண்பினை எந்நாளும் கைக்கொள்வாயாக; அப்பண்பு உன்னைவிட்டு ஒருபோதும் நீங்க விடாதே !
மனசாட்சிக்கு எதிராக நடுநிலை தவறி ஒருசார்பாக நடந்துகொள்ளும் தவற்றைச் செய்யாதே; நடு நிலையைப் போற்றுவாயாக !
அதுபோல், பெருஞ் செல்வம் உன்னை வந்து அடைவதாயினும் கூட, நண்பர்கள் மீது ஐயம் கொண்டு அவர்களிடம் ஒப்படைத்த செயலைப் பற்றி ஆராய்ச்சி செய்யாதே
!
-------------------------------------------------------------------------------------------------
அருஞ்சொற்பொருள்:
------------------------------------
அஞ்சாமை
= அஞ்சுதற்குரிய செயல்களில் அஞ்சாமலிருக்கும் பண்புக்கு
; அஞ்சுதி = நீ
அஞ்சுவாயாக ; ஒன்றில் = ஒரு செயலில்
; தனக்கு ஒத்த = தனக்குக் கூடுமான ; அளவு
எல்லாம் = அளவுக்கு ; எஞ்சாமை
= பிறருக்கு உதவி செய்யும் பண்பினை ; எஞ்சல்
= குறைய விடாதே ; நெஞ்சு அறிய = உள்ளமறிய
; கோடாமை = ஒருசார்பாக ஒழுகாச் செயலை ; கோடி
= கொள்வாயாக ; பொருள் பெறினும் = எத்துணைப்
பெருஞ் செல்வம் கிடைப்பதாயினும்
; நட்டார்கண்
= நண்பர்களின் பொறுப்பில் ; விட்ட
வினை = ஒப்படைத்த செயல் பற்றி ; நாடாதி
= ஐயம் கொண்டு ஆராய்ச்சி செய்யாதே.
-------------------------------------------------------------------------------------------------
கருத்துச் சுருக்கம்:
--------------------------------
அஞ்சவேண்டிய செயல்களுக்கு அஞ்சுக ! உன்னால் இயன்ற அளவுக்குப் பிறருக்கு உதவி செய்வதில் பின்வாங்காதே ! எதிலும் நடுநிலை
தவறி ஒருசார்பாக நடந்து கொள்ளாதே ! நண்பர்களிடம்
ஒப்படைத்த பணியைப் பற்றி வீண் ஆராய்ச்சி செய்யாதே !
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),03]
{19-11-2021}
-------------------------------------------------------------------------------------------------
