சங்க காலத்திய நூலான நான்மணிக்கடிகை 106 வெண்பாக்களைக் கொண்டது. ஒவ்வொரு பாடலிலும் நந்நான்கு கருத்துகள் வலியுறுத்தப்படுகின்றன ! மொத்தம்
106 பாடல்களைக் கொண்ட இந்நூலை இயற்றியவர் விளம்பி நாகனார் என்னும்
பெரும் புலவர். இதிலிருந்து ஒரு பாடல் !
-----------------------------------------------------------------------------------------------
பாடல் எண்:
(28)
---------------------------
அலைப்பான் பிறவுயிரை ஆக்கலும் குற்றம்
விலைப்பாலில் கொண்டூன் மிசைதலும் குற்றம்
சொலற்பால அல்லாத சொல்லுதலும் குற்றம்
கொலைப்பாலும் குற்றமே யாம்.
------------------------------------------------------------------------------------------------
பொருள்:
----------------
கொன்று உண்பதற்காக ஆடு, மாடு, கோழி, பன்றி போன்ற பிற
உயிரினங்களை இரைபோட்டு வளர்த்தல் குற்றமாகும் !
விலைகொடுத்து வாங்கி வந்து , பிற உயிரினங்களின் இறைச்சியை சமைத்துப் பக்குவபடுத்தி உண்பதும் குற்றமாகும் !
சொல்லக் கூடாத, பண்பாடில்லாத, அருவருப்பான சொற்களைப் பிறரை நோக்கிச் சொல்லுதலும் குற்றமாகும் !
அதுபோல், மொழிக்கொலை, நட்புக் கொலை, பண்புக் கொலை, நம்பிக்கைக் கொலை போன்ற அனைத்துக் கொலைகளும் குற்றமேயாகும் !
------------------------------------------------------------------------------------------------
அருஞ்சொற்பொருள்:
-------------------------------------
அலைப்பான்
= கொன்று உண்பதற்காக ; பிற
உயிரை = ஆடு, மாடு, கோழி, பன்றி போன்ற பிற உயிர்களை ; ஆக்கலும்
குற்றம் = வீட்டில் வளர்ப்பதும் குற்றம் ; விலைப்பாலின்
= விலை கொடுத்து ; ஊன் கொண்டு = இறைச்சியைப்
பெற்று வந்து ; மிசைதலும் குற்றம் = சமைத்து
உண்பதும் குற்றமாகும் ; சொலற்பால
அல்லாத = சொல்லும் வகையின அல்லாத சொற்களை ; சொல்லுதலும் குற்றம் = உரைத்தலும்
குற்றம் ; கொலைப்பாலும் = மொழிக்கொலை,
நட்புக் கொலை, பண்புக் கொலை, நம்பிக்கைக்
கொலை போன்றவையும் ; குற்றமே ஆம் = குற்றமே ஆகும்.
------------------------------------------------------------------------------------------------
சுருக்கக்
கருத்து:
-----------------------------
பிறவுயிர்களைக் கொன்று உண்பதற்காக அவற்றை வளர்த்தலும் குற்றம் ; அங்ஙனம்
கொல்லாமல் அவற்றின் ஊனை விலைக்கு வாங்கி உண்ணுதலும் குற்றம் ; சொல்லத் தகாதவற்றைச்
சொல்லலும் குற்றம் ; கொல்லலும் குற்றமேயாம்
!
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),03]
{19-11-2021}
------------------------------------------------------------------------------------------------
