உலகியல்நெறி சார் கருத்துகளை எடுத்துரைக்கும்
நூல் நான்மணிக்கடிகை ! விளம்பி நாகனார் என்னும் பெரும் புலவர் இயற்றிய இந்நூல் சங்ககால இலக்கியங்களுள் ஒன்று.
பாடல் தோறும் நான்கு கருத்துகளைப் புலவர் வலியுறுத்துகிறார். இதோ
உங்களுக்காக ஒரு பாடல்
!
-----------------------------------------------------------------------------------------------
பாடல் எண்:
(44)
-------------------------
போரின்றி வாடும் பொருநர்சீர் கீழ்வீழ்ந்த
வேரின்றி வாடும் மரமெல்லாம்
- நீர்பாய்
மடையின்றி நீள்நெய்தல் வாடும்
படையின்றி
மன்னர்சீர் வாடிவிடும்.
------------------------------------------------------------------------------------------------
சந்தி பிரித்து எழுதிய பாடல்:
------------------------------------------------------------------------------------------------
போர் இன்றி வாடும் பொருநர் சீர்;
கீழ் வீழ்ந்த
வேர் இன்றி வாடும் மரம் எல்லாம்
– நீர் பாய்
மடை இன்றி நீள் நெய்தல் வாடும்;
படையின்றி
மன்னர் சீர் வாடிவிடும்.
------------------------------------------------------------------------------------------------
கருத்துரை:
------------------
போர் இல்லாமல் படை வீரர்கள் நீண்ட நாள் வாளாவிருந்தால், அப்படைவீரர்களின்
வீரமும் தீரமும் முற்றிலுமாகக் குறைந்து போகும் !
நிலத்தினுள் இறங்கி மரத்திற்கு
வலிவையும் உயிரையும் ஊட்டும் வேர்கள்
அறுந்து போனால், மரம் விரைவாகப் பட்டுப்போகும் !
நெய்தல் மலருக்கு நீரூட்டிச் செழிக்கச்
செய்யும் மடை தூர்ந்து போய்,
நீர் அற்றுவிட்டால், நெய்தல்
மலர்கள் கொடியோடு உலர்ந்து போகும் !
அதுபோல்,
நாட்டைக் காக்கும்
மன்னனின் படைகள் வெகுவாக வலுவிழந்து போனால், அம்மன்னனின் நாடும் விரைவாக அழிந்து போகும் !
------------------------------------------------------------------------------------------------
சொற்பொருள்:
------------------------
பொருநர் சீர்
= போர் வீரரின் சிறப்பு; போரின்றி
= போர் இல்லாவிடின்; வாடும் = குன்றிவிடும்; மரம் எல்லாம்
= எல்லா மரங்களும்; கீழ் வீழ்ந்த = நிலத்துள்
இறங்கிய; வேர் இன்றி = வேர் அறுந்துவிடின்;
வாடும் = பட்டுப் போய்விடும்; நீள்
நெய்தல் = நீண்ட நெய்தல் மலர்கள்; நீர்
பாய் மடை = நீர் பாயும் மடையில்; இன்றி
= நீர் அற்றுவிட்டால்; வாடும் = உலர்ந்து போய்விடும்; மன்னர் சீர் = அரசனின் செல்வம்
; படையின்றி = நாட்டைக் காக்கும் படை இல்லாவிடின்;
வாடிவிடும் = அழிந்து போய்விடும்.
------------------------------------------------------------------------------------------------
சுருக்கக் கருத்து:
--------------------------
போர் இல்லாவிடின் படைவீரர்களின் சிறப்புக் கெடும்; வேர் அற்றுவிடின் மரங்கள் பட்டுப் போய்விடும்; நீர் அற்றுவிடின் நெய்தல் உலர்ந்துவிடும்; படை
இல்லாவிடின் வேந்தனது சீர்மை அழிந்து போய்விடும்.
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),04]
{20-11-2021}
------------------------------------------------------------------------------------------------
