உலகியல்நெறி சார் கருத்துகளை எடுத்துரைக்கும்
நூல் நான்மணிக்கடிகை ! விளம்பி நாகனார் என்னும் பெரும் புலவர் இயற்றிய இந்நூல் சங்ககால இலக்கியங்களுள் ஒன்று.
பாடல் தோறும் நான்கு கருத்துகளைப் புலவர் வலியுறுத்துகிறார். இதோ
உங்களுக்காக ஒரு பாடல்
!
-----------------------------------------------------------------------------------------------
பாடல் எண்:
(45)
------------------------
ஏதிலா ரென்பார் இயல்பில்லார் யார்யார்க்கும்
காதலா ரென்பார் தகவுடையார்
– மேதக்க
தந்தை யெனப்படுவான் தன்னுவாத்தி
தாயென்பாள்
முந்துதான் செய்த வினை.
------------------------------------------------------------------------------------------------
சந்தி பிரித்து எழுதிய பாடல்
------------------------------------------------------------------------------------------------
ஏதிலார் என்பார் இயல்பு இல்லார்
யார்யார்க்கும்
காதலார் என்பார் தகவு உடையார்
– மேதக்க
தந்தை எனப்படுவான் தன் உவாத்தி தாயென்பாள்
முந்து தான் செய்த வினை.
------------------------------------------------------------------------------------------------
கருத்துரை:
------------------
நல்லியல்பு
(நற்குணமும் நல்லொழுக்கமும்) இல்லாத எந்த மனிதரும் நமக்கு ஒருபோதும் உறவினர் ஆகார்; அயலாரே !
நம்மீது உண்மையான அன்பு வைத்திருக்கும் யாரும் நல்லியல்பு
(நற்குணமும் நல்லொழுக்கமும்) உடையவராகவே இருப்பார்
!
மேன்மையான தந்தை எனப்படுபவர் நமக்கு
நல்வழி காட்டி நடத்திச் செல்லும் உயரிய ஆசானாகவும் உறுதியாக இருப்பார் !
நம்மீது அளவற்ற அன்பும் நீங்காத
பற்றும் வைத்திருப்பவள், நமது தாயாக அமைவது நாம் முன்பு செய்த நல்வினையாகும்
!
(குறிப்பு:
இப்பாடலில் மூன்றாம் அடியில் வரும் உவாத்தி என்பது தமிழ்ச்சொல் அன்று
! இடைசெருகல் நிகழ்ந்துள்ளது ! “தன்னுவாத்தி”
என்பதற்கு மாற்றாக “தன்னாசான்” என்று இருந்தாலும்
தளைதட்டவில்லை. )
------------------------------------------------------------------------------------------------
சொற்பொருள்:
----------------------
ஏதிலார் என்பார்
= அயலார் என்று கருதப்படுபவர்கள்;
இயல்பு இல்லார் = நல்லியல்பு இல்லாதவர்கள்; யார்
யார்க்கும் = யாவர்க்கும்; காதலார் என்பார்
= அன்பர் எனப்படுவார்; தகவு உடையார் = நல்லியல்பு
உடையவர்கள்; மேதக்க = மேன்மையான; தந்தை எனப்படுவான்
= தந்தை என்று சொல்லப்படுபவன்; தன் உவாத்தி
= தன் ஆசிரியனாவான்; தாய்
என்பாள் = மேன்மையான தாய் என்று சொல்லப்படுபவள்;
முந்து = முற்பிறப்பில்; தான் செய்த
வினை = தான் செய்த நல்வினையாகும்.
------------------------------------------------------------------------------------------------
சுருக்கக் கருத்து:
--------------------------
ஒருவனுக்கு, நல்லியல்பு (நற்குணம்)
இல்லாதாவர் எல்லோரும் அயலார்; யார்க்கும்
நல்லியல்பு உடையவரே அன்புடையார்; மேலான
தந்தை எனப்படுபவன் ஆசிரியனுக்குச் சமம்; மேன்மையுடைய தாயென்பாள், முன்பு
செய்த நல்வினைப் பயனாகும்.
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),04]
{20-11-2021}
------------------------------------------------------------------------------------------------
