விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
---------------------------------------------------------------------------------------------
பாடல் எண்: (72)
--------------------------------
பதிநன்று பல்லார் உறையின் ஒருவன்
மதிநன்று மாசறக் கற்பின் – நுதிமருப்பின்
ஏற்றான்வீ றெய்தும் இனநிரை தான்கொடுக்குஞ்
சோற்றான்வீ றெய்துங் குடி.
--------------------------------------------------------------------------------------------
சந்தி பிரித்து எழுதிய பாடல்:
---------------------------------------------------------------------------------------------
பதி நன்று பல்லார் உறையின்; ஒருவன்
மதி நன்று மாசு அறக் கற்பின்; – நுதி
மருப்பின்.
ஏற்றான் வீறு எய்தும் இன நிரை; தான்
கொடுக்கும்
சோற்றான் வீறு எய்தும் குடி.
----------------------------------------------------------------------------------------------
கருத்துரை:
-----------------------
முயற்சியும் ஒற்றுமையும் உடைய நன்மக்கள் பலபேர் ஒரு ஊரில்
வாழ்வர்களாயின் அந்த ஊர் வாழ்வதற்கு மிக நல்ல ஊராகும் !
எவற்றையெல்லாம் ஒருவன் கற்கிறான் என்பதைவிட, கற்பவற்றை ஐயந்திரிபக் கற்பானாகில் அவனது அறிவு தெளிவு பெறும் !
கூர்ங் கொம்புகளை உடைய எருதுகள் உடனிருக்குமாயின், மேய்ச்சல்
நிலத்தில் ஆனிரைகளின் பாதுகாப்பு மிகுதியாகத் திகழும் !
ஏழை எளியவர்க்கு உணவளித்து அவர்களின் வயிற்றுப் பசியை எவனொருவன் தீர்க்கிறானோ, அவனது குலம் தழைத்தோங்கும் !
---------------------------------------------------------------------------------------------
சொற்பொருள்:
---------------------------
பல்லார் உறையின் = பலரும்
நிறைந்து ஒத்து வாழ்வார்களானால் ; பதி நன்று = ஊர் நன்றாகும் ; மாசு
அறக் கற்பின் = குற்றம் அறும்படிக் கற்பானாயின் ; ஒருவன்
மதி நன்று = ஒருவனது அறிவு தெளிவு பெறும் ; இன நிரை = ஆனிரைகள் ; நுதி
மருப்பின் = கூரிய கொம்புகளை உடைய ; ஏற்றான் = எருதுகளால் ; வீறு
எய்தும் = சிறப்படையும் ; தான் கொடுக்கும் = தான்
ஏழைகளுக்குக் கொடுக்கும் ; சோற்றான் = உணவினால் ; குடி = தான் பிறந்த குடி ; வீறு
எய்தும் = பெருமை அடையும்.
---------------------------------------------------------------------------------------------
சுருக்கக் கருத்து:
--------------------------------
பலரும் நிறைந்து ஒத்து உறைவாரானால் ஊர் நன்றாம் ; ஒருவன் ஐயந் திரிபறக் கற்பானானால்
அவன் மதி நன்றாகும் ; ஆனிரைகள் கூர்ங்கொம்புகளை உடைய ஏறுகள் உடனிருத்தலால் சிறப்படையும் ; ஏழைகட்கு
உணவளிப்பதனால் ஒருவனது குடி மேலோங்கும் !
---------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
"நான்மணிக்கடிகை” வலைப்பூ,
[தி.ஆ:2052,நளி (கார்த்திகை),26]
{12-12-2021}
--------------------------------------------------------------------------------------------
