பத்துப்பாட்டு, எட்டுத்தொகை என வகைப்படுத்தப் பெற்ற இலக்கியங்களைத்
தவிர்த்து, எஞ்சிய பல இலக்கியங்கள் பதினெண்
கீழ்க்கணக்கு நூல்கள் என வகைப்படுத்தப் பெற்றுள்ளன; அவற்றுள்
ஒன்று தான் நான்மணிக் கடிகை ! ஒவ்வொரு பாடலிலும் நந்நான்கு
கருத்துகளை எடுத்துரைப்பதால் இந்நூல் நான்மணிக் கடிகை என வழங்கப்பெறுகிறது ! இதிலிருந்து ஒரு பாடல் !
---------------------------------------------------------------------------------------------
பாடல்
எண் (18).
-----------------------------
கடற்குட்டம் போழ்வர் கலவர் படைக்குட்டம்
பாய்மா உடையான் உடைக்கிற்குந் - தோமில்
தவக்குட்டந் தன்னுடையான் நீந்தும் அவைக்குட்டம்
கற்றான் கடந்து விடும்.
-------------------------------------------------------------------------------------------
சந்தி
பிரித்து எழுதிய பாடல்:
-------------------------------------------------------------------------------------------
கடல்குட்டம் போழ்வர் கலவர்; படைக்குட்டம்
பாய்மா உடையான் உடைக்கிற்கும்; - தோம் இல்
தவக்குட்டம் தன்உடையான் நீந்தும்; அவைக்குட்டம்
கற்றான் கடந்து விடும்.
-------------------------------------------------------------------------------------------
குட்டம் = ஆழம்; ஆழம் உடைய கடல்
-------------------------------------------------------------------------------------------
கருத்துரை:
-----------------------
படகு, தோணி, நாவாய், போன்ற மரக்கலம் உடையவர்கள் ஆழமான கடலாக இருந்தாலும் கூட, அதன் நீரைப் பிளந்து கொண்டு
செல்வார்கள் !
காற்று
போல் கடிது செல்லும் படைக் குதிரையை உடைய
வீரன், பகைவரது படை என்னும் கடலின் கரையை உடைத்துக் கொண்டு செல்வான் !
மனதைத்
தன்வயப்படுத்தும்
வல்லமை உடையவன், குற்றங் குறைகளற்ற தவம் என்னும்
ஆழ்கடலை நீந்திக் கரையேறுவான் !
அதுபோல், தெள்ளத் தெளிவாகக் கல்வி கற்றவன், கற்றறிந்த அறிஞர்கள் நிறைந்த அவை என்னும் ஆழ்கடலை எளிதில்
எதிர்கொண்டு கடந்து செல்வான் !
-------------------------------------------------------------------------------------------
சொற்பொருள்:
------------------------------
கலவர் = மரக்கலம் உடையவர் ; கடல் குட்டம் = கடலின் ஆழமான நீரை ; போழ்வர் = பிளந்து செல்வர் ; பாய்மா உடையான் =
காற்று
போல் கடிது செல்லும் வலிமையான குதிரையை உடைய வீரன் ; படைக்குட்டம் = பகைவரது படை என்னும்
ஆழ்கடலின் கரையை ; உடைக்கிற்கும் = போரிட்டு உடைத்து விடுவான் ; தன் உடையான் = தன் மனதைத் தன்வயப்படுத்தியவன் ; தோம் இல் = குற்றமில்லாத ; தவக்குட்ட = தவம் என்னும் ஆழ்கடலை ; நீந்தும் = நீந்திக் கரையேறுவான் ; கற்றான் = தெளியக் கற்றவன் ; அவைக்குட்டம் = கற்றறிவுடையோர் நிரம்பிய அவை என்னும் கடலை ; கடந்துவிடும் = எதிர்கொண்டு கடந்து செல்வான்.
-----------------------------------------------------------------------------------------
சுருக்கக்
கருத்து:
--------------------------------
மாலுமிகள் நீர்க்கடலையும், மறவர் படைக் கடலையும், தற்காப்புடையான் தவக்கடலையும், கற்றான் அவைக் கடலையும் கடத்தல் எளிது !
-------------------------------------------------------------------------------------------
ஆக்கம் + இடுகை;
வை.வேதரெத்தினம்,
[veda70.vv@gmail.com]
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),02]
{18-11-2021}
-------------------------------------------------------------------------------------------
