விளம்பி நாகனார் இயற்றிய நான்மணிக் கடிகை, பதினெண்
கீழ்க்கணக்கு நூல் வகையைச் சார்ந்தது . கடைச்சங்க
கால இலக்கியமான இதில் 106 செய்யுள்கள் உள்ளன. அனைத்தும்
வெண்பாக்களால் ஆனவை ! இதிலிருந்து ஒரு பாடல் !
-----------------------------------------------------------------------------------------------
பாடல் எண்:
(36)
------------------------
இரும்பின் இரும்பிடை போழ்ப - பெருஞ்சிறப்பின்
நீருண்டார் நீரான் வாய்பூசுப - தேரின்
அரிய அரியவற்றாற் கொள்ப - பெரிய
பெரியரான் எய்தப் படும்.
------------------------------------------------------------------------------------------------
பொருளுரை:
---------------------
இரும்பினாற் செய்யப் பெற்ற உளி, வெட்டிரும்பு, கொடிறு, சுத்தியல்
போன்ற கருவிகளைக் கொண்டே அதே இரும்பை வெட்டித் துண்டாக்குகின்றனர் !
நீர்கலந்த உணவுகளான, பாற்சோறு,
கன்னலமுது (பாயசம்), பழையசோறு
போன்றவற்றை உண்போர், அதே
நீர் கொண்டே தம் வாயைக் கழுவித் தூய்மை ஆக்குகின்றனர் !
செய்து முடிப்பதற்கு மிகவும்
கடினமான அரிய செயல்கள் பலவும் ஊக்கமுடையவர்களின் அரிய முயற்சிகளால் தான் இவ்வுலகில் செய்து
முடிக்கப் பெறுகின்றன !
அதுபோல், பட்டம்,
பதவி,
பாராட்டு போன்ற பெரிய
பேறுகள் எல்லாம் பெரிய
மனிதர்களால் தான் அடையப் பெறுகின்றன !
------------------------------------------------------------------------------------------------
சொற்பொருளுரை:
-----------------------------
இரும்பின் = இரும்பினாற் செய்யப் பெற்ற கருவிகளாலேயே ; இரும்பு = இரும்பினை ; இடை
போழ்ப = குறுக்கே வெட்டித் துண்டாக்குவர் ; பெரும் சிறப்பின் = மிக்க
சிறப்புடைய ; நீர் உண்டார் = நீர் கலந்த பாற் சோறு
போன்ற உணவுகளை உண்பவர்கள்
; நீரால் = நீரைக்
கொண்டே ; வாய் பூசுப = வாயைக் கழுவிக் கொள்வர் ; தேரின் = ஆராய்ந்து
பார்த்தால் ; அரிய
= அரிய செயல்கள் ; அரியவற்றான் = அருமையான
முயற்சிகளால் ; கொள்ப
= முடித்துக் கொள்வர் ; பெரிய = பெரிய
பேறுகள் ; பெரியரான் = கல்வி கேள்விகளையுடைய
பெரியோர்களால் ; எய்தப்படும் = அடையப்படும்.
------------------------------------------------------------------------------------------------
சுருக்கக் கருத்து:
-------------------------
இரும்புக் கருவிகளால் இரும்பை வெட்டுவர்; நீருணவுகளை
உண்டார் நீரினால் வாய் கழுவுவர்;
அரிய செயல்களை அரிய முயற்சியாற் கொள்வர்; பெரிய
பேறுகளைப் பெரியோர் எய்துவர்.
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
“நான்மணிக்கடிகை” வலைப்பூ.
[தி.ஆ:2052,நளி(கார்த்திகை),04]
{20-11-2021}
------------------------------------------------------------------------------------------------
