விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
-----------------------------------------------------------------------------------------------
பாடல் எண்: (94)
------------------------------
இளமைப் பருவத்துக்
கல்லாமை குற்றம்
வளமிலா போழ்தத்து
வள்ளன்மை குற்றம்
கிளைஞரில் போழ்திற்
சினங்குற்றம் குற்றந்
தமரல்லார் கையகத்
தூண்.
-----------------------------------------------------------------------------------------------
சந்தி பிரித்து
எழுதிய பாடல்:
-----------------------------------------------------------------------------------------------
இளமைப் பருவத்துக்
கல்லாமை குற்றம்;
வளமிலா போழ்தத்து
வள்ளன்மை குற்றம்;
கிளைஞர் இல் போழ்தில்
சினம் குற்றம்; குற்றம்
தமர் அல்லார் கையகத்து
ஊண்.
-------------------------------------------------------------------------------------------------
கருத்துரை:
----------------------
இளம் பருவத்திலேயே
கல்வி கற்க வேண்டும்; அப்படிக் கல்லாமல் தவிர்ப்பது தீய விளைவுகளைத் தரும் பிழையாக முடியும் !
பொருள் வரவு இல்லாத
காலத்தில் ஈகை தவிர்க்க வேண்டும்; அப்படித் தவிர்க்காமல் ஈதல், இழப்புகளைத் தரும் பிழையாக முடியும் !
உறவினர்களின் துணை
இல்லாத காலத்தில் பிறரைச் சினக்கலாகாது; அப்படிச் சினப்பது, கேடு விளைவிக்கும் பிழையாக முடியும் !
உள்ளத்தில் அன்பில்லாதவர்
இல்லத்தில் உணவருந்தக் கூடாது; அருந்துதல் மானத்திற்கு ஊறு விளையும் பிழையாக முடியும் !
------------------------------------------------------------------------------------------------
சொற்பொருள்:
----------------------------
இளமைப் பருவத்து = இளம் பருவத்தில் ; கல்லாமை குற்றம் = கல்லாதொழிதல் பிழையாம் ; வளம் இலா = பொருள் வருவாய் இல்லாத போழ்தத்து = காலத்தில் ; வள்ளன்மை = ஈகை இயல்பு ; குற்றம் = பிழையாம் ; கிளைஞர் இல் போழ்தில் = உறவினர்கள் துணையில்லாத காலத்தில் ; சினம் குற்றம் = பிறரோடு சினத்தல் குற்றமாம் ; தமர் அல்லார் = தமக்கு உள்ளன்பு இல்லாதாரது ; கையகத்து = இடத்தில் ; ஊண் = உண்ணுதல் ; குற்றம் = பிழையாம்.
-------------------------------------------------------------------------------------------------
சுருக்கக்
கருத்து:
--------------------------------
இளம் பருவத்தில்
கல்லாமை குற்றம்; பொருளில்லாத காலத்தில் ஈதல் குற்றம் ; உறவினர் துணையில்லாத காலத்தில் பிறரைச் சினத்தல் குற்றம் ; உள்ளன்பு இல்லாதவர் மாட்டு உண்ணுதல் குற்றம்.
------------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),27]
{13-12-2021}
------------------------------------------------------------------------------------------------
கருத்துகள் இல்லை:
கருத்துரையிடுக