விளம்பி நாகனார் இயற்றிய நான்மணிக்கடிகை பதினெண் கீழ்க்கணக்கு நூல்களுள் ஒன்று ! இந்நூல் சங்ககாலத்தைச் சேர்ந்தது ! பாடல் தோறும் நான்கு கருத்துகளை எடுத்துரைக்கிறார் இந்தத் தமிழறிஞர். இதோ உங்களுக்காக ஒரு பாடல் !
---------------------------------------------------------------------------------------------
பாடல் எண்: (97)
-------------------------------
கள்ளின் இடும்பை களியறியும் நீரிடும்பை
புள்ளினுள் ஓங்கல் அறியும் நிரப்பிடும்பை
பல்பெண்டிர் ஆள னறியும் கரப்பிடும்பை
கள்வன் அறிந்து விடும்.
----------------------------------------------------------------------------------------------
சந்தி பிரித்து எழுதிய பாடல்:
----------------------------------------------------------------------------------------------
கள்ளின் இடும்பை களி அறியும்; நீர்
இடும்பை
புள்ளினுள் ஓங்கல் அறியும்; நிரப்பு
இடும்பை
பல் பெண்டிராளன் அறியும்; கரப்பு
இடும்பை
கள்வன் அறிந்துவிடும்.
----------------------------------------------------------------------------------------------
கருத்துரை:
---------------------
குடித்துப் பழகியவனுக்கு குடிப்பதற்கு ஒருநாள் கள் கிடைக்கவில்லையெனில் அதனால் உண்டாகும் துன்பத்தை, கட்குடியனே நன்கு அறிவான் !
மழைத்துளிகளைப் பருகி உயிர்வாழும் இயல்புடைய வானம்பாடிப்
பறவை, ஒருநாள் நீர் கிடைக்கவில்லையெனில் அதனால் உண்டாகும் துன்பத்தை அப்பறவையே நன்கு அறியும் !
பொருள் தட்டுப்பாடு ஏற்பட்டு வறுமையால் உண்டாகும் துன்பத்தை
பல மனைவியரை உடைய ஒரு கணவனே நன்கு
அறிவான் !
திருடிவந்த பொருள்களை யாருக்கும் தெரியாமல் மறைவாக ஒளித்து வைப்பதற்குத் தான் எதிர்கொள்ளும் துன்பங்களைத் அத்திருடனே
நன்கு அறிவான் !
-----------------------------------------------------------------------------------------------
சொற்பொருள்:
---------------------------
கள்ளின் இடும்பை = கள்ளைப்
பெறாமையால் வரும் துன்பத்தை ; களி அறியும் = கள்ளுண்டு களிப்பவன் அறிவான் ; நீர்
இடும்பை = நீரைப் பெறாமையால் வரும் துன்பத்தை ; புள்ளினுள் = பறவைகளுள் ; ஓங்கல்
அறியும் = வானம் பாடிப் பறவை அறியும் ; நிரப்பு
இடும்பை = பொருளின்மையால் வரும் வறுமைத் துன்பத்தை ; பல் பெண்டிராளன் = மனைவியார்
பலரை உடைய கணவன் ; அறியும் = அறிவான் ; கரப்பு இடும்பை = ஒன்றை
ஓரிடத்தில் ஒளித்து வைப்பதிலுள்ள துன்பத்தை ; கள்வன் = திருடன் ; அறிந்துவிடும் = அறிந்துகொள்வான்.
----------------------------------------------------------------------------------------------
சுருக்கக் கருத்து:
--------------------------------
கள் பெறாமையால் உண்டாகும் துன்பத்தைக் கட் குடியன் அறிவான் ; நீர்
பெறாமையால் உண்டாகும் துன்பத்தை வானம்பாடிப் பறவை அறியும் ; பொருள்
இல்லாமையால் உண்டாகும் வறுமைத் துன்பத்தை மனைவியர் பலரை உடையவன் அறிவான் ; ஒன்றை
ஒளித்து வைப்பதில் உள்ள துன்பத்தைத் திருடன் அறிவான்.
-----------------------------------------------------------------------------------------------
ஆக்கம் + இடுகை;
வை.வேதரெத்தினம்,
ஆட்சியர்,
”நான்மணிக்கடிகை” வலைப்பூ,
[தி.ஆ:2052,நளி (கார்த்திகை),28]
{14-12-2021}
-------------------------------------------------------------------------------------------
கருத்துகள் இல்லை:
கருத்துரையிடுக